「山旮旯OK」 齊來唱首客家歌
我們常講保衞粵語，但香港未開埠前，新界已有許多客家人聚居，都是原居民。但客家話比粵語失落得更快。藝術家葉啟俊（俊俊）曾做客家話研究，去年參加川龍的秋祭大典，發現原來村民熱衷唱K，心諗點都會聽到幾首客家歌啩，「點知，真係冇。」原來對上一批會客家話的村民都已四十幾歲，平時除了「講秘密」博細路仔聽唔明外，就唔講了；客家山歌一人識一啲，但大家都不知對方會唱。於是，俊俊請村民親身示範客家歌，用英文、粵語拼音、廣東話加自創的音標譯成字幕，整了個「山旮旯OK」（HAKKAOKE）擺喺村公所，新知舊友齊齊唱。他本來想學《家有喜事》咁，搵村民幫手改寫HK（Hakka）Pop，搵咗《小李飛刀》、《山水有相逢》等歌曲，但客家話用語與廣東話相差太遠，繙譯失敗，俊俊說：「我想要首快歌，如鄭伊健的《極速》，但村長話我哋太文謅謅，如『聯群結黨』，客家話冇，只能改做『全部一隊』（讀時仲要有力先啱音），如果真要就需重新填詞。在此呼喚邊位客家高人出手相助，豐富山旮旯ok曲譜。」改詞需時，不如掉返轉將山歌配樂重新編曲，村長兒子Adi最鍾意hip hop版《阿婆賣鹹菜》，連唱三次非常沉迷，如果讀者中有Jazz、Blue甚至K-pop高手，來行山看展覽時，或可出手幫忙作吓曲。