沪语朗读：叶雁
朗读者麻球
原创：西坡 ( 夜光杯 )
沪语改写、诵读：叶雁
推荐：丁迪蒙今朝，吃麻球，来三！做人，假使讲可以像麻球搿能“心腹全空”、“四面圆光”，搿个是肯定勿来三个！
现在，有勿少人拿“开口笑”搭麻球混到一道去了。搭“开口笑”一样，麻球个外表也是圆个，并且滚满了芝麻。但里向就有交关勿同了。“开口笑”是实心、呒没馅子个，麻球则是空心或者是有馅子个。还有一点区别相当重要，“开口笑”是面粉做个，麻球呢，则是用糯米粉做个。
有一趟，我到一家有名个老字号点心店去做“体验”。店经理讲，阿拉店里向还有一种看家个点心——麻球，阿要吃吃看？结果呢，麻球来了，一开始，我就有点失望：哪能像粒荔枝大小呢；再一吃，搿勿就是一只滚满芝麻个油炸汤团啊！离我心目当中个麻球相差忒远了。
就像侬所晓得个搿能，阿拉勿能讲有馅子个或者小一眼个麻球勿应当算麻球，但是讲到大家侪认可个麻球，好像至少有一只拳头搿能大，里向是空空个，内壁浪有黑洋酥或者是糖水。至于讲圆润个外表、棕黄个颜色、轻盈个身段及香脆个吃口，侪是一只好个麻球必备个特点。
搭老多人一样，我本来对于麻球为啥能膨胀到介大，为啥内部会形成介大个空间，一直理解勿了。后来经过老法师个点拨，再有点懂了。比如勒糯米粉里向必定要摆适量个小麦淀粉，而且勿能直接摆勒糯米粉里，一定要用开水烫熟。假使拿一小块糯米粉捏成团蒸熟，再搭其他糯米粉拌勒一道；假使糯米粉里加适量个泡打粉；假使油氽时要对麻球进行一定个挤压、拍打，促使其反弹、膨胀……搿些操作技巧对我来讲是毫无意义个。但是呢，我个疑问的确是千千万万个麻球爱好者邪气希望破解个难题。
我曾经勒衡山路一家宾馆个餐室里吃过一只老老大个空心麻球。哪能大？大到必须要用两只手一道夹起来再好吃。不过伊轻飘飘个程度好像是充了气个洋泡泡。搿还勿算，人家个麻球常常是勒内壁浪向挂勒海或者勒空间里向荡了一层黑洋酥或者是一泡糖水。伊呢，黑洋酥居然是嵌勒外皮搭籽内壁个夹层里个。要晓得，外皮搭内壁之间个厚度只有一两毫米。直到今朝，我还是无法想象出点心师是哪能拿馅料填到搿个夹层里去个。迭种手艺真是达到了顶级个水平。
虽然制作一只好吃又有颜值个麻球，勒“卖油翁”一样个点心师傅眼睛里是一桩再简单勿过个事体。勿过，勒吃货眼中无异于雕琢一件精巧个工艺品。我希望自家像正勒专心欣赏魔术个观众，而勿再坐立勿安、心心念念纠结于是勿是要拿迭个变戏法个过程暴露勒光天化日之下。
我勿晓得古代是否有麻球个名目。清代著名学者黄钺所著《壹斋集》卷三八诗题云：“今市有和米粉作桃杏大，中实以糖，煎以沸油，曰油饣追。”好像有点像了。又，屈大均《广东新语》卷一四曰：“广东乡俗，岁终，以烈火爆开糯谷，以为煎堆馅。煎堆者，以糯粉为大小圆，入油煎之，以祀先及馈送亲友也。”又有点近了。再，梁绍壬《两般秋雨庵笔记》载：“煎堆一名麻蛋，以面作团，炸油镬中，空其内，大者如瓜，粤中年节及婚嫁，以为馈遗。”掰就完全贴合了。
其中，“麻蛋”“空其内”“大者如瓜”之类关键词，是煎堆与麻球挂钩必不可少的要素。
让我最有兴趣个是，《两般秋雨庵笔记》中引诗人余半眉咏“煎堆”（麻球）诗，曰：“安得规模如此大，不堪心腹竟全空。四面圆光皆客气，一番投赠半虚花。”伊对麻球个描述，闲话里向有闲话个呀。当然，醉翁之意勿勒“球”——伊告诫大家：吃麻球，来三；做人，假使像麻球搿能“心腹全空”、“四面圆光”，搿是万万勿可以个！
图片来自网络
往期回顾：
茅屋为秋风所破歌
养蚕宝宝
衡山路高安路一带，叫做“圣乔治”
妈妈脸上的皱纹
“苏北人”搭仔“江北人”勒语气浪有差异
我是红楼哪一钗？
大隐书局沪语诵读会
观沧海
表情
高墙与鸡蛋——耶路撒冷文学奖获奖演讲
咸亨一享
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号